Búðir á Snæfelssnesi

Það kemur engum hlutdrægni mín á óvart þegar Snæfellsnesið er annars vegar. Þangað fer ég eins oft og ég mögulega get og hæli því eins oft og ég get. 

Langþráðar vegabætur hafa átt sér stað á nesinu síðustu ár sem betur fer. Til viðbótar við almenna vegakerfið er búið að lagfæra veginn að hótel Búðum og Búðakirkju. Ekki var vanþörf á, þvi vegurinn var stórhættulegur og annaði ekki þeirri miklu umferð þangað niður eftir. Ég er afar ánægður með hvernig til tókst. Gamla vegstæðið fékk að halda sér og hlykkjast vegurinn áfram í gegnum hraunið. Hann er aðeins breiðari og ekkert umhverfisrask átti sér stað. Hótel Búðum og Búðakirkju er verðugur sómi sýndur með þessari vegagerð. Umhverfi Búða er alveg ótrúlegt og erfitt reynist að finna ástæðu þess að svæðið gagntekur flesta sem þangað leggja leið sína.  Nú loksins hægt að aka á varanlegu slitlagi kringum Snæfellsnes, lokið hefur verið við að leggja á síðasta hluta vegarins í Snæfellsnesþjóðgarði eins og svæðið er nefnt í dag, reyndar var alltaf talað um að fara "framanundir". Sama á við um veginn fyrir nesið og í Búðahrauni, vegstæðið er að mestu það gamla.Tekist hefur að leggja þessa nýju vegspotta í mesta bróðerni við náttúruna.

Til hamingju Snæfellingar.